如果食左沙門氏菌落肚，佢會響我地條腸入面玩咩？點解要攪到我地痾足幾日先安樂？簡單黎講，沙門氏菌既任務，係要霸佔晒我地條腸，唔比其他菌一齊住。所以呢，沙門氏菌既先頭部隊就會攻佔左條腸既表層細胞，佢地一方面會令呢啲細胞失去左控制水份平衡既特性，令到大家飲果八杯水吸收唔到之餘仲從身體扯走啲水，所以大家就痾到七彩。另一方面，佢地入到啲腸細胞之後亦會引黎白血球既攻擊，即係令條腸發炎。於是乎腸入面既正常細菌就咁被沖走晒，沙門氏菌既中游部隊就唔使同其他菌爭地盤，舒舒服服咁住響條腸入面。但係唔知係佢地笨定點啦，佢地令到條腸係咁繼續放水同發炎，佢地自己都留唔得太耐，一樣會被白血球消滅同被沖走。呢個入侵細胞同被沖走既循環一直持續，直至啲沙門氏菌被沖走晒。所以我地中招後就會痾足好幾日先清得晒啲菌。唔同菌有唔同引起肚痾既原因，有機會再同大家分享一下。